Aŋwà’ne gie metsítsà shwóŋè ngiemboon tsàa gaŋá náa mbwó fùɔ Ngiemboon
*******
Tÿǒsòŋo Tsɔ́ɔn na lyɛ̌ʼ lepfwɔ’ɔ́ na saŋ mbʉ̀ŋ á na ngùʼ ntsáʼ pʉ́a lé ntsɔ̀b tʉ̂a lé móm mbʉ́a.
Metsítsà shwóŋè pɔ́ tsẅé láʼa ngiembɔɔn tsàa gaŋá
Á
mbwó nɔ̀ɔntemà’ fùɔ Ngiemboon.
Zɔɔn metʉ̌a, peg náa yɔɔn ŋwà’ne lélɔg ésíe gú mbɔɔ mekěm lá’ ntsèm.
Púʼ ntʉ̀ te sye, peg te gíŋ ńdá’a ńdyé wɔ́.
Kwà’ mmó gie á gege wég á gwɔ́ pá’ gie ashwóŋè pɔ́ tsẅé lá’a yégè cʉ́’ʉ ḿbú ḿbyé pyě.
Pú’ ntʉ̀ te sye!
Gyá pá’ gie p̧ʉ̀a ngiemboon cʉ́’ ńdɔgɔ pɔ́ shwóŋè nduɔlǔɔ éshwóŋe tsàa metsìŋe ndá mɔ́b.
Nyìŋ gẅie à kǎg tʉ̀ tɛ’ á gwaa ne éshwóŋe ngiemboon ńne ḿvoŋte lé metsɔ́ meshwóŋè ndyà’a
Á laa tsɔ́ fʉ’, mé gwaa túm penkʉ́ náa mbʉ̀a lá’ tsàa tâm á gwɔ́ légʉa ńzí’i shwóŋè pɔ́ tsẅé lá’ kwà’ mboŋó.
Tá’ áa lyǎ’ɔɔn mbà á keen ésa shÿó.
penkʉ́ cʉ́’ʉ ńgee mbʉ̀a lá’ ńtsyeen pɔ́ memá pɔ́b pelÿò na shwóŋè nduɔlǔɔ.
ḿbiŋ te gwaa éfó wó ńzí’i yɔ́b tsɔ́ twó mmó na shwóŋè Ngiembɔɔn wɔ́.
Á gwɔ́ pú’u, etsɔ̌ ntsem gie ńgwɔ́ mé gíŋe ńtÿɔ́g ńdɔg ńkwáa e lá’ te wó wɔ́
Alá’a yégè lɔgɔ pú’u ńcʉ́’ʉ ńgwɔ́ pɔ́ pá’ tÿǒ te meŋaŋ la.
Ewégè shÿó lɔgɔ pú’u ḿbú ḿbyé .
Zɔɔn metʉ̌a, pege lɔɔn ńdíe líe mbà lá’ má ge pú cʉŋte.
Ankwɔbɔ́, peg ne ńzsé ngie lelÿò pʉ̀a té gíŋe ńgẅiin tâm légʉa ńzɔgɔ ndá sekú ńnéŋe ńzí’i shwóŋè lá’ wɔ́
Tá’ peg ge shwóŋo gú lemaŋ sie é keen ńtó.
Mé tóŋ le sekú shwóŋè Ngiemboon tsàa gaŋá.
Ńgwɔ́ gie nyìŋ lɔɔn ńtsẅé pɔ́ nzɔ̌ jʉ’ ndùm njÿó wɔ́, á néŋe pɔ́ mbʉ̀a yé ńdɔgɔ kẅíkẅíle we ńzí’i tà éfele.
Lelÿò pʉ̀a nyé te zsě yǎ ntí sekú.
Lepiŋ ńgÿo ta mé pú ńzsé, aa léná nkʉ̀ mbwó mekěm lá’ mbɔɔ mefùɔ ngiemboon pie ée tsàa metÿǒsòŋ ntsèm.
Ńzsé ngie wɔ̌wɔ́ɔ kǔu na yé jʉ’ ńgíŋ ńtsege wǎ nkʉ̀ mbwó pʉ̀a pé mé pú ńzẅá’.
Shúshu mbà zɔɔn metʉ̌a, pege kág tʉ̀ lékú’te shwóŋè pɔ́ tsẅé lá’a yégè
ńzsé ngie pege lɔ̌g ńkwá yege nzèm.
Mekùʼ mbà lóo !
Ée metsítsà shwóŋè pɔ́ tsẅé lá’a ngiembɔɔn tsàa gaŋá
Le Collectif des moniteurs en ligne de la langue Ngiemboon
Pour le Collectif
Contact :
M. PIATA LÉONARD, Promoteur et superviseur général de l’enseignement en ligne du ngiemboon, Membre d’honneur du CLCN
Tél. : 699 48 05 15 /
© Mesa’ako Patsoon N° 009 juillet 2025, édition consacrée au Laakem et la sortie officielle de Fouo Djiotsoon
https://mesaako.com/2025/08/07/az-abc-a-ngwane-gie-metsitsa-chwonge-ngiemboon-tsaa-ganga-naa-mbwo-fouo-ngiemboon/
